Kompatriotas PUDD husi Jaco to Citrana, husi Tasi-Mane to'o Tasi-Feto mak PUDD hadomi.

Ho momento furak nebe Ita lao hamutuk ba tinan 10 ona. Natal 2025 no tinan foun 2026 ba PUDD sente orgulho tanba ita hakat liu dezafiu no susesu barak. Dezafiu Hirak nee fo lisaun ba ita atu refleta hodi hadia!! no susesu halo Ita hatene atu hakat ba nebe no oinsa atu hakat ba futuru nebe diak liu ba PUDD no ba Timor-Leste.

Ho momentu Natal Furak ida nee, tinan politiku lao ba oin no hela tinan ida tan ba prosesu Eleisaun Prezidensial nebe la kleur tan ita Halao iha 2027!! Ho momentu Natal ida nee PUDD hakarak hato'o hela ba militante no simpatisante sira katak, oras ne dadaun ita halao hela ita nian prioridade lubuk ida hanesan tuir mai nee:

1. Reajustamentu Estrutura Nasional hodi halo preparasaun ba kongresu nasional.

2. Estabelesimentu sede nasional ba PUDD iha Metiaut, Ita atinji ona depois de tinan barak ita laiha sede nasional ida nebe akumula Ita hotu nian interese.

3. Prioridade Politika ba Ajustamentu Estrutura Munisipiu nebe ita halao hela. Ita finaliza on reajustamentu Estrutura ba Munisipiu Baucau, Aileu no Viqueque. Iha hela preparasaun final ba Munisipiu: Liquiça, Oecusse, Ermera, Manufahi, Covalima no Bobonaro. Iha diskusaun intensiva Molok mediu tinan 2026 Ita nian Estrutura reajusta hotu ona ba munisipiu hirak nebe seidauk. Nune'e iha Setembro 2026 Ita iha ona estrutura definitiva ba Nasional no Munisipiu. Nune'e iha Outubro to'o Dezembru 2026 PUDD iha ona akordu no Planu konkreta ba tinan 2027 liuliu ligado ba estratejia hasoru Eleisaun Prezidensial 2027 nebe Ita atu hakat ba ho forsa politika Ampla nebe kondisiona ho Ita nian prioridade ba UNIDADE NASIONAL Ida nebe reprezenta Ita hotu nian interese komun.

Atu uza moos oportunidade kmanek Ida nee; Estrutura PUDD nasional, PRESIDENTE PUDD ho Estrutura, KNFPP no Estrutura, Orgaun Partido, Estrutura Munisipiu katak PUDD sei la haluha ita nian prioridade politika ba dezenvolvimentu sosial no ekonomia militante no simpatisante PUDD nian ba kategoria ida...Ekonomia ba foin sae no idozos Sira nebe inkluzivu.

Fiar katak mudansa nebe ita halo dadaun iha tinan ida nee, hahu ho momentu ita Na'i Jesus Cristo neebe sei moris ho Natal Santo ida nee sei fo esperansa foun ba ita hotu no povo doben iha tinan foun 2026 ba oin sai prosperu liu tan.

Hakuak boot no domin rohan laek ba ita hotu.

Viva PUDD

Viva Timor-Leste

Presidente PUDD

Sekretáriu Jeral PUDD

Presidente KNFPP

Estrutura Nasional e Munisipiu